معظم الوظايف دلوقت بقى متاح فيها أوبشن العمل الحر أو الفري لانسينج يعني مبقتش مضطر إنك تشتغل تحت مظلة شركة علشان توفر لنفسك حياة كريمة، وفي الفترة الأخيرة أكيد شفت تجارب لناس كتير سابت شغلها في الوظيفة واتجهت للعمل الحر في مجال آخر أو نفس المجال، وأحيانا في بعض الأفكار الخاطئة بتوصل للناس زي إن العمل الحر عبارة عن مميزات فقط وأصبح دلوقت حلم كل الشباب، بل الموضوع وصل لوصف العمل في الشركات للعبودية وذم الوظيفة وبقى في رغبة عارمة عن كتير من الناس إنهم يسيبوا وظايفهم ويتجهوا للعمل الحر ظنا منهم إن هو دا حبل النجاة والسبيل الوحيد للراحة الأبدية، ودا مش حقيقي خالص.
يمكن العمل الحر أيوه فيه مميزات ولكن مفيش حاجة مفيهاش غير مميزات، كل حاجة في الدنيا دي ليها مميزات وعيوب، فالعمل الحر زيه زي الوظيفة أو العمل في شركة، فيه عيوب زي ما له مميزات
خلونا نقسم الكلام في البداية لجزئين علشان الدنيا تبقى واضحة، هنتكلم الأول عن العمل الحر مميزاته وعيوبه، وبعد كده نتناول العمل في الشركات أو الوظيفة من حيث المميزات والعيوب، بحيث يكون عندنا رؤية منصفة لكلام الحالتين ونقدر نعرف إيه يناسبنا منهم.
- العمل الحر
- المميزات
- من مميزات العمل الحر هو إنك تقدر تشتغل في أي مكان سواء من بيتك أو من مساحة عمل مشترك أو من أي مكان أنت شايف إنه مؤهل كبيئة عمل بالنسبالك، والمكان ده كمان قابل للتبديل والتغيير فيه
- أنت رئيس نفسك، يعني مفيش حد غالبا بيديك أوامر وبيملي عليك اللي المفروض تعمله، بل بتكون أنت المتحكم في كل حاجة سواء هتعمل إيه هتاخد مشاريع إيه وإيه المشاريع اللي هترفضها
-تقدر تشتغل في أي وقت من اليوم بما يناسب طبيعة نومك والوقت اللي عاوز تقضيه في الشغل، ودا يناسب جدا لو حد بيحب يشتغل بالليل في الهدوء ويكون مركز أكتر
-بتقدر تتحكم في الدخل بتاعك على حسب عدد الساعات اللي بتشتغلها في اليوم، بتحدد سعر الساعة بتاعتك وتشوف إيه يناسب مجهودك وده اللي بتشتغل بيه، وعلى أساسه بتقدر تحدد الدخل اللي يدخل في الشهر على حسب عدد الساعات اللي بيدخلك
- مفيش حد بيفرض عليك طريقة معينة في الشغل، يعني تقدر تنفذ المشروع اللي شغال عليه بأي تقنية وبأي أدوات طالما دا في إيدك والعميل مشترطش عليك حاجة معينة، يعني مش مضطر تتعامل مع الأدوات اللي الشركة بتححدهالك ومتخرجش عنها، بالعكس الموضوع بيبقى فليكسابل أكتر وأنت غالبا اللي بتحدد إيه يريحك في طريقة الشغل، يعني مثلا لو أنت بتشتغل مونتير كفري لانسر فأنت بتختار البرنامج الأسهل ليك في التعامل، يعني لو متقن لأدوبي بريمير أكتر من دافنشي ريزولف تقدر تستخدمه هو طالما بيأدي نفس الغرض والوظيفة، ولو أنت مبرمج فمفيش حد بيفرض عليك IDE معين تكتب عليه الكود، بتختار الأكثر راحة ليك واللي شايفه مناسب.
- تقدر تاخد أجازة في أي وقت، يعني تقدر في أسبوع مثلا تتوقف عن استقبال عروض ومشاريع جديدة وتاخد أجازة وتستجم أو تقضي الوقت دا مع أهلك أو تتفسح أو أيا كان اللي هتعمله، مش زي الشركات أيام الأجازات بتكون في السنة محددة وعلشان تاخد أجازة لمناسبة خاصة بيك لازم تستأذن من مديرك أو المشرف عليك واحتمال ميوافقش لو الوقت في الشركة مش مناسب لاتاحة أجازات للعاملين فيها.
-عندك خيار إنك تشتغل في الحاجة اللي بتحبها بس بدون أي مسؤوليات خارجية من صاحب العمل أو المدير، وأنت كمان اللي بتختار تتعلم تقنية جديدة وتشتغل بيها تساعدك أو لا.
- عيوب العمل الحر
- مفيش مرتب ثابت زي الشركات، ودا بيكون مشكلة في بعض الأحيان لو حد عنده ارتباط أسري، لإنك ممكن يعدي عليك شهر أو أكتر مفيش فيه شغل، ولو معندكش مخزون تصرف منه لحد ما تستلم مشاريع جديدة فده هيكون مشكلة.
- بعض الناس معندهاش المقدرة إنها تنظم وقتها وتلزم نفسها بالشغل عدد ساعات معين طالما هو شغال لوحدة بدون توجيه، فممكن يتراكم عليك حاجات ودا يضيع منك فلوس وفرص، فالشخص دا بيحتاج يكون حدد محددله التاسكات اللي هيشتغل عليها ومعاد تسليمها وعلى الأساس دا بيشتغل، ولو الشخص دا سبناه لنفسه كده غالبا هيكسل ومش هيحسن التخطيط وإدارة وقته والإلتزام بالشغل اللي وراه.
-مفيش فريق بتشتغل معاه علشان تتبادلوا الخبرات، واحتمالية الخطأ في الشغل بتكون أكتر لإن أي قرارا بيكون طالع من شخص واحد بس ومفيش تشاور وعرض آراء، فلو مبتفكرش في الحاجة كويس غالبا دا هيكون مشكلة، وكمان تقدمك في المجال وفرصة تعلمك لحاجات جديدة هيكون أقل من اللي بيشتغل في شركة نظرا لوجود بيئة عمل حواليه بتمكنه من إنه يتعلم منهم ويتبادل معاهم الخبرات.
- وجود احتمالية للنصب عليك من العملاء اللي بتتعامل معاهم، أينعم دلوقت معظم المواقع بتاعة العمل الحر فيها آليات بتقلل عمليات النصب زي إنها بتاخد من العميل مايل ستون في بداية التعاقد علشان تضمن ليك حقك، ولكن كل فترة بيظهر طرق وحيل جديدة للنصب، وأنا شخصيا تعرضت لمواقف من دي أكتر من مرة لحد ما أتعلمت إزاي أتعامل مع العملاء وأضمن حقي وفلوسي متروحش عليا بعد ما أعمل الشغل المطلوب مني وأتعب فيه.
- في العمل الحر أنت المتكفل بكل حاجة، يعني مفيش تأمين صحي ليك ولا مكافئات ولا رحلات تبع المكان اللي بتشتغل فيه، الفايدة الوحيدة اللي بتاخدها من الشغل هي الفلوس اللي بتتحصل عليها لما تخلص المشروع، يعني لو لاقدر الله تعبت فمش هتلاقي مكان تتعالج فيه ببلاش تبع الشركة اللي أنت شغال فيها، هتبقى متكفل بمصاريف علاجك وكمان وقت التعب دا مبيكونش في داخل جايلك علشان بتكون مبتشغلش غالبا.
-قولنا إن من المميزات إنك تقدر تتحكم في الوقت اللي بتشتغل في خلال اليوم، لكن لو مقدرتش تحدد ده وتدير وقتك بشكل كويس الموضوع هيفرط من إيدك وتبقى مش عارف تفصل وقت فراغك عن وقت الشغل، وهتكون غالبا شغال طول الوقت، أو على الأقل بالك مشغول باللي وراك وهتعمل فيه إيه.
- مميزات العمل في شركة
- وجود مرتب ثابت ومعروف، ودا بيمثل لكتير من الناس أمان اجتماعي لإنه بيعمل حسابه عليه وعارف بالضبط هو دخله كام في الشهر، فلوس عاوز مثلا يشتري حاجة تقسيط هيقدر يعرف مدى إمكانية ده بالنسبة لمرتبه كل شهر.
-وجودك في بيئة عمل دا محفز كبير ليك جدا على الإنتاجية وهتلاقي نفسك بتتزق لوحدك وتكتسب خبرة يوم عن يوم، يعني مثلا لو قابلتلك مشكلة في الشغل ففي على الأقل شخص أو اتنين حواليك تقدر تسألهم في المشكلة دي ويفيدوك فيها و تتبادلوا الخبرات سوا، فوجودك في مجتمع له علاقة بالشغل بتاعك بيفرق جدا في تقدمك وخبرتك.
- وجود benifets الشركات بتقدمها زي التأمين الصحي والمكافئات والهدايا، وأحيانا كمان بعض الشركات بتوفر أجهزة كويسة للموظفين يستخدموها ويشتغلوا عليها وكمان وفي بعض الأحيان بتقدملهم اشتراكات شهرية في باقات للموبايل أو الإنترنت بجودة عالية.
-لو مبتعرفش تدير وقتك بشكل كويس فالموضوع ده مش هيبقى مشكلة لما تكون شغال في شركة، لإن كل شركة بالفعل بتتبع استراتيجات مختلفة للمشاريع والعمل عليها وتوزيع المهام وتسليمها، هتلاقي معظم الشركات بتشتغل بأدوات تخص الإنتاجية زي تريلو بورد، ودا من خلاله بتقدر تعمل assign للتاسكات لكل شخص علشان يقوم بدوره وتعرفه كل اللي المفروض يعمله.
- أثناء فترات الأجازة مرتبك مبيتأثرش بده سواء كانت أجازات رسمية أو أجازات مرضية، يعني لو تعبت وقعدت في البيت لفترة فالشركة بتحترم ده وفقا لقانون العمل اللي بيضمن ليك أجازة مرضية مدفوعة الأجر، فمرتبك بيكون ثابت وشغال حتى لو أنت في فترة ما انقطعت عن العمل لأي ظرف.
- عيوب العمل في شركة
- لو الشركة بتفرض عليك إنك تروح الشغل في المقر بتاعها فده بياخد منك وقت ومجهود، وقت لإنك بتركب غالبا مواصلة للمكان اللي فيه شغلك وعلى ما بتروح مبتكونش في أفضل حالة ذهنية وجسمانية للعمل، وكمان بتاخد منك فلوس في المواصلات، يعني مثلا لو قولنا إن شخص من الأقاليم بيشتغل في شركة في أكتوبر وبيسافر كل يوم، فعلى الأقل بيركب مواصلة ساعة ونص رايح وساعة ونص جاي، ففي 3 ساعات فرهدة بس، ولو فكر إن هو ياخد سكن جمب المكان اللي بيشتغل فيه فدا هيجي على حساب وجوده في البيت وكمان بيكون مكلف شوية.
- مينفعش تشتغل بطريقتك الخاصة، لازم تتبع سياسة الشركة في العمل، يعني لو بيشتغلوا بطريقة معينة أو بأدوات معينة فأنت مطالب تكون بتشتغل على نفس الأدوات دي علشان التيم كله بيكون بيتعامل مع بعضه ويقدروا يستلموا الشغل من بعض، وكمان بتفرض عليكم توحيد كتير من طرق العمل زي مثلا طريقة كتابة الكود في حالة لو أنت مبرمج فلازم يكون الفريق كله بيكتب زي بعضه علشان المشروع مش بيتوقف على شخص واحد بل مراحل بتسلم مراحل.
- الإحتكاك بالناس غالبا بيجيب مشاكل، وخصوصا لو معاك في الشركة نوعيات من الناس المنفسنة أو اللي نفوسها مش نضيفة فدايما هتلاقي نفسك داخل في مشاكل لو مقدرتش تتعامل بشكل كويس في إدارة علاقاتك داخل الشركة.
- لو عملت أي غلطة بيتم محاسبتك عليها إما بالخصم أو لفت النظر أو ما إلى ذلك.
- أنت ملزم بالتقنيبات والأدوات اللي الشركة كلها بتشتغل بيها، حتى لو كنت شاطر في تقنية تانية أو أداة تانية فأنت ملزم تشتغل باللي الشركة بتفرضه عليك واللي هي شايفاه مناسب للبيزنيس مودل بتاعها
